NORA ANTIFA: Ensin muyeres nun hai revolución. IKE, de la máquina de coser a la barricada.

Na memoria del movimientu obreru asturianu de cutiu tendemos a enfatizar aquella imaxe que representaba a un asturianu como un paisanu con madreñes y un fusil al llombu o portando una carga de dinamita, imaxe qu'alimentaría la mitoloxía española mientres munchos años. De la mesma, na hestoria más recién, guardamos na nuesa memoria la fuelga minera del 98, Duru Felguera o Naval Xixón pero si referímonos a les trabayaores de IKE pocos van saber de lo que falamos, sobremanera los más mozos.

Un aspeutu a tener en cuenta pa la mocedá antifascista y revolucionario asturiana ye'l recuperar pa la memoria del movimientu obreru aquelles muyeres qu'ensin tregua decidieron resistir y lluchar en llugar d'agachar les oreyes y rindise. Nesti aspeutu, les muyeres de IKE representen un claru exemplu de coraxe y solidaridá. Esta ye la so hestoria.

En 1952 la visita al estáu español del presidente estadounidense Dwight Eisenhower (tamién conocíu como Ike) suponía'l fin del aislamientu de la España facista; ye entós cuando se funda Confeccciones Xixón y llanza al mercáu la so afamada camisa IKE (el so nome comercial) n'honor al presidente americanu. Llegen a fabricar más d'un millón de camises al añu tantu pal mercáu nacional como pa la esportación con una plantiya de 600 emplegaes.

La hestoria de IKE ye la hestoria de la reconversión industrial n´asturies: primeros despidos y reaxustes siguíu de más despidos y más reaxustes p'a la fin acabar con too dexando na cai a miles de trabayadores, tou esto cola collaboración de los gobiernos socialistes rexonales y nacionales y les continues traiciones de los sindicatos mayoritarios.

Confecciones Xixón yera una empresa con fuerte enraigu na ciudá compuesta casi na so totalidá por muyeres de mediana edá ensin demasiada tradición sindical. Ente 1984 y 1999 les muyeres trabayaores de IKE aprendieron rápido a lluchar polos sos puestos de trabayu enfrentándose a la policía, a los empresarios, a los sindicatos mayoritarios y al poder políticu pero primero de too, los más importante, tuvieron el coraxe abondu pa desfacese de los llastres que teníen de cargar pol pixín fechu de ser muyeres y trabayaores lo que llevo a munches d'elles a revelase inclusive a les sos propies families.

De 1990 a 1994 les muyeres trabayaores de Ike ocuparon la fábrica y tolos martes y xueves ficieron manifestaciones y concentraciones. Les xente que participó naquelles concentraciones en sofitu a les trabayaores nunca van escaecer a aquelles señores bien vistíes, con falda y tacones y perfectamente peñaes cargando con un montón de neumáticos qu'amburaben en metá de la carretera. Nuna época onde una empresa que cerraba en asturies yera daqué común, les trabayaores de IKE dieron un exemplu de resistencia obrera y dignidá, coraxe y autodeterminación que los llevó a protagonizar acciones perdures a lo llargo de toa una década.

Les trabayaores de Ike tuvieron qu'empezar dende'l principiu, la so hestoria ye la crónica de la toma de conciencia de clase trabayadora y de muyer.

La llucha de IKE supon un puntu y aparte nel movimientu obreru asturianu non solo polos continuos enfrentamientos cola policía, les barricaes amburaes y demás acciones, sinón pol so allongamientu nel tiempu.

Dende asaltar un barcu mercante nel puertu de Xixón hasta espertar al presidente autonómicu a diariu; dende zarrase n'embaxaes estranxeres hasta pasiar un pollín poles cais de Xixón con un cartelu nel que se lleía “alministración”;dende utilizar aguyes de coser de tamañu industrial pa defendese de los antidisturbios hasta entamar un sistema de convivencia que-yos dexó vivir mientres cuatro año nuna fábrica ensin agua nin calefacción, periodu de tiempu que sirvió por que munches d'elles retomaren los estudios que tuvieron qu'abandonar pa entrar a trabayar na fábrica. Crearon una tienda autoxestionada na que vendíen camises pa recaldar fondos ya inclusive se presentaron a les elecciones municipales lo que xeneró una gran polémica dando llugar al enfervorecíu ataque de la clase política y el consiguiente desprestixu calificándoles de terroristes.

Basta citar cualquier crónica de la prensa d'entós pa facese una idea de les proporciones de la movilización qu'aquelles muyeres llevaron a cabu :

“Siete trabajadoras heridas, tres de las cueles tuvieron que ser ingresadas en el hospital de Cabueñes, y cinco detenidas es el balance de los graves incidentes ocurridos a las tres y diez de la tarde de ayer en la autopista Gijón-Oviedo-Avilés, cuando las trabajadoras de confecciones Gijón (IKE), apoyadas por otros trabajadores, colocaban una barricada de neumáticos en la carretera en la calzada. Las numerosas cargas de la Unidad de Intervención del Cuerpo Nacional de Policía contra las trabajadoras provocaron escenas de pánico y dolor, con mujeres tiradas por el suelo, con golpes y patadas lo que unido a los gritos causó una fuerte tensión y nerviosismo, en especial cuando las trabajadoras intentaban retirar a sus compañeras heridas o conmocionadas (…) en los últimos años, a los largo de los diversos incidentes protagonizados por los trabajadores del sector naval y de talleres Moreda y otros colectivos laborales, nunca la policía utilizó las defensas reglamentarias como en la tarde de ayer. La intervención policial provocó entre los trabajadores una ola de indignación y ello puede causar que en los próximos días se radicalicen las movilizaciones.” El Comercio, 14 de marzo de 1990.

Fai yá dellos años, nuna charra na que participaben dalgunes de les trabayaores de IKE cuntábennos cómo los continuos enfrentamientos cola policía yeren bien violentos; a diferencia d'otros conflictos como Naval Xixón o fuelgues mineres los antidisturbios escasamente buscaben el cuerpu a cuerpu, sicasí a elles llovíen-yos los palos por toos llaos pero ellí siguíen, enfrentándose a la policía con tou lo que teníen al so algame inclusive con fiambreres.

La hestoria de IKE ye la hestoria de la muyer revolucionario y combativo que conoció l'amargura de la traicicón pero que supo llanta-y cara por aciu la fuerza de la solidaridá. Va dellos meses enterámonos pola prensa que'l sindicatu UXT concedía un premiu a Paz Fernandez Felgueroso pol so trabayu na meyora de les condiciones de la muyer; que-yos pregunten a a quellas trabayaores de IKe la postura de la entós alcaldesa de Xixón y el papel que xugó naquellos años. Son aquelles muyeres les que dieron un exemplu a la clase trabayaora, aquelles muyerones con faldes y tacones amosaron el camín a siguir. Ensin muyeres nun hai volución.